ပဝဲပှၤကညီတကလုာ်အံၤဟဲအိၣ်ဝဲဆိးဝဲဒၣ်လၢကီၢ်အမဲရကၤတဘ့ၣ်အပူၤအိၣ်ဝဲအါမးန့ၣ်လီၤ. ဖဲပအိၣ်လၢကီၢ်ပယီၤမ့ၢ်ဂ့ၤ, ကီၢ်ဆၢမ့ၢ်ဂ့ၤ, ယိၤကီၢ်အပူၤမ့ၢ်ဂ့ၤ,ပအိၣ်ဒီးပတၢ်အိၣ်ဖှိၣ်ဒၣ်ဝဲစုာ်စုာ် တကးဘၣ်ပအိၣ်ဒီး ပတၢ်အိၣ်ဖှိၣ်သရၣ်သမါတဖၣ်စ့ၢ်ကီးလီၤ. ဒ်န့ၣ်အသိးပဘူၣ်ထီၣ်ဘါထီၣ်ဘၣ်ယွၤလၢပကျိာ်ဒၣ်ပကစၢ်ဝဲလီၤ. ဘၣ်ဆၣ်ပဟဲတုၤလၢကီၢ်အမဲရကၤအပူၤဒီးပဘူၣ်သကိးဘါသကိးဘၣ်ယွၤလၢပှၤကိၤလၤဝါဖိသ့ၣ်တဖၣ်လီၤ. တမ့ၢ်ပကျိာ်ဘၣ်. ပတနၢ်ပၢၢ်အါအါဘၣ်. ဘၣ်ဆၣ်ပဘၣ်ဘူၣ်သကိးဘါသကိးတၢ်ဒီးအဝဲသ့ၣ်လီၤ. လီၤဆီဒၣ်တၢ်ပတၢ်အိၣ်ဖှိၣ်သရၣ်သမါ, ယွၤအတၢ်မၢဖိသ့ၣ်တဖၣ်အိၣ်စှၤဂၤဒီးပှၤပတီၢ်မုၢ်ဖိအါဝဲအဃိပှၤလၢအကဲခိၣ်ကဲနၢ်လၢတၢ်ဘူၣ်တၢ်ဘါတကပၤစှၤဝဲဒိၣ်မးလီၤ. ပထံၣ်ဘၣ်လၢပပှၤကလုာ်သ့ၣ်တဖၣ်ထံၣ်ဘၣ်ဒီးကွၢ်ဆၢၣ်မဲာ်ဘၣ်ဝဲတၢ်ကီတၢ်ခဲဒိၣ်ဒိၣ်မုၢ်မုၢ်ခီဖျိနီၢ်သးအဂံၢ် အဘါစှၤဝဲဒိၣ်မးအဃိလီၤ.

ဘၣ်ဆၣ်ယွၤဟ့ၣ်ပဝဲကညီဖျိသ့ၣ်တဖၣ်တၢ်ထံၣ်အသီခီဖျိပဖုသရၣ်ဒိၣ်သးဂ့ၤ (KBCUSAပှၤပၢၤလီၢ်ဆ့ၣ်နီၤမၤတ့ၢ်တၢ်) အဃိ လၢယွၤအတၢ်သုးတၢ်ကျဲၤအဖီလာ်ပအိးထီၣ်န့ၣ်ဘၣ် KBCUSA အလံာ်စီဆှံကၠိအမံၤမ့ၢ်ဝဲ ကညီယွၤဂ့ၢ်ပီညါတၢ်သိၣ်လိလီၢ်ခကၣ်သး (Karen Theological Study Center (KTSC)) ဖဲ ၂၀၁၅ လါစဲးပထ့ဘၢၣ် ၈သီဟါဖဲ ဝ့ၢ် St. Paul, MN န့ၣ်လီၤ. တၢ်အိးထီၣ်ကၠိအတၢ်ပညိၣ်မ့ၢ်ဒ်သိးအမဲရကၤကညီဘျၢထံခရံာ်ဖိတဖၣ်ကဘၣ်တၢ်ဒုးဒိၣ်ထီၣ်နီၢ်သးအသဟီၣ်အဂီၢ်, တၢ်လီၢ်လၢအလိၣ်ဘၣ်ယွၤအတၢ်မၢဖိတဖၣ်ကဒိးန့ၣ်ဘၣ်ပှၤမၤတၢ်သးခုကစီၣ်တဖၣ်အဂီၢ်န့ၣ်လီၤ. ပတၢ်မၤလိအံၤအိၣ်ဝဲဒီးအတီၤခံတီၤ ဒီးမ့ၢ်ဝဲဒၣ်ယွၤဂ့ၢ်ပီညါတၢ်မၤလိအလံာ်အုၣ်သး (Certificate of Theological Studies (CTS)) ဒီး တီၤဒိၣ်လာ်ယွၤဂ့ၢ်ပီညါတၢ်မၤလိ (Diploma in Theology (DT)) တဖၣ်န့ၣ်လီၤ. ကၠိခိၣ်မ့ၢ်ဝဲသရၣ်မုၣ် ဆံးမုၢ်ဒီး သရၣ်, သရၣ်မုၣ်သိၣ်လိတၢ်တဖၣ်တစှၤန့ၣ်ဘၣ်တဆံခံဂၤဘၣ်.

တၢ်မၤလိအံၤမ့ၢ်ဝဲဆၢကတီၢ်ဖုၣ်တၢ်မၤလိ (Intensive Course) အဃိပှၤကၠိဖိတဖၣ်ကဘၣ်မၤလိဝဲ ခံပတီၢ်လၢတၢ်မၤလိ နံၣ်တနံၣ်အဂီၢ်န့ၣ်လီၤ. တၢတပတီၢ်န့ၣ်ကဘၣ်မၤလိဝဲခံနွံဒီးဘၣ်ကွဲးတိာ်ထီၣ်လံာ်, အိၣ်ဒီး တၢ်ဒိးစဲးဒီးအိၣ်ဝဲဒီးတၢ်မၤလိပျီ (Field Work)  သ့ၣ်တဖၣ်လီၤ. DT ကၠိဖိသ့ၣ်တဖၣ်ကဘၣ်ကွဲးတိာ်ထီၣ်တၢ်ကွဲးဃိထံ (Research Paper) မ့ၢ်ဝံၤမးကဒိးန့ၣ်ဘၣ်လံာ်အုၣ်သးန့ၣ်လီၤ. တနံၣ်အတီၢ်ပူၤကၠိထီၣ်အဆၢကတီၢ်ကမ့ၢ်ဝဲ လါမးၡးဒီးလါစဲးပထ့ဘၢၣ်န့ၣ်လီၤ.  ကဘၣ်ထီၣ်ဝဲဒၣ် ၂နံၣ်ဝံၤဒီး ကဖျိဝဲဒၣ်န့ၣ်လီၤ.

ပှၤလၢအဖျိထီၣ်လၢယွၤဂ့ၢ်ပီညါတၢ်သိၣ်လိလီၢ်ခၢၣ်သးတဖၣ်ကဘၣ်တၢ်တူၢ်လိာ်အီၤအီၤလၢ KBCUSA တၢ်အိၣ်ဖှိၣ်တဖၣ်န့ၣ်လီၤ. စးထီၣ်လၢ ၂၀၁၇ တုၤ ၂၀၂၀ နံၣ် ပှၤဖျိထီၣ် အိၣ်ဝဲ ၄ဖု ဒီးပှၤဖျိကၠိခဲလၢာ်အိၣ်ဝဲ ၁၀၂ ဂၤလံန့ၣ်လီၤ. ဒီးပှၤဖျိထီၣ်တနီၤကဲထီၣ်သရၣ်ဒိၣ်ပာ်စုဒီးတနီၤကဲထီၣ်တၢ်အိၣ်ဖှိၣ်သရၣ်ဒီးတနီၤမၤစၢၤတၢ်လၢတၢ်အိၣ် ဖှိၣ်, တနီၤလၢကဝီၤဒီး တနီၤလၢကီၢ် လံန့ၣ်လီၤ.

ဆၢမုၢ်လၢ်လၢနံၣ်လၢကဟဲဆူညါတဖၣ် ပကၠိတဖျၢၣ်အံၤကဒုးအိၣ်ဖျဲၣ်န့ၣ်ယွၤတၢ်မၢဖိတဖၣ်နံၣ်လီၤ. စံးဘျုးဘၣ်ကစၢ်ယွၤအဘျုးအဖှိၣ်လၢပဝဲ KBCUSA အိးထီၣ်ဘၣ်ဝဲလံာ်စီဆှံအဃိန့ၣ်လီၤ. ကိးနံၣ်ဒဲး စဲးပထ့ဘၢၣ် ၃နွံတနွံ ကမ့ၢ်ဝဲ ပဝဲယွၤဂ့ၢ်ပီညါတၢ်သိၣ်လိလီၢ်ခၢၣ်သး (KTSC) အမုၢ်နံၤအဃိဃ့ကညးဒီးစံးဘျုးဆိဘၣ် KBCUSA တၢ်အိၣ်ဖှိၣ်ကိးဖုဒဲးလၢကမၤစၢၤဆီၣ်ထွဲပကၠိအံၤလၢတၢ်ထုကဖၣ်, တၢ်မၤဘူၣ်မၤဝီၢ်ဒီး တၢ်ဂ့ၢ်အကလုာ်ကလုာ် တဖၣ်အဂီၢ်န့ၣ်လီၤ.

(၁ၡမူၤ ၂း၃၀) စံးဝဲ ပှၤလၢအမၤလၤကပီၤယၤန့ၣ်ယကမၤလၤကပီၤအီၤအသိးမ်ယွၤဆိၣ်ဂ့ၤဘၣ်သုဝဲခဲလၢာ် ထူးထူးတီၤတီၤခီဖျိလၢသုတၢ်အဲၣ်ဆီၣ်ထွဲပဝဲလံာ်စီဆှံကၠိအဃိန့ၣ်တက့ၢ်.