KTSCUSA
တၢ်ကတိၤဆၢဂ့ၤ
ကၠိခိၣ်တၢ်ကတိၤဆၢဂ့ၤ
ကစၢ်ယွၤအဘျုးအဖှိၣ်အတၢ်ဆိၣ်ဂ့ၤဆိၣ်ဝါဒိၣ်ဝဲအါဝဲလၢကညီယွၤဂ့ၢ်ပီညါတၢ်သိၣ်လိလီၢ်ခၢၣ်သး(Karen Theological Study Center) အဃိအိၣ်သူၣ်လီၤအသးပှဲၤထီၣ်(၅နံၣ်, ၂၀၁၅-၂၀၂၀)နံၣ်န့ၣ်လီၤ. လၢတနံၣ်ဘၣ်တနံၣ်အတီၢ်ပူၤဒိးန့ၢ်ဘၣ်တၢ်ဆိၣ်ဂ့ၤဆိၣ်ဝါလၢအိၣ်ဖျဲၣ် ဘၣ်ဖိလံၤဖျိကၠိတဖၣ်ခဲလၢာ်အိၣ်(၁၀၂)ဂၤလံန့ၣ်လီၤ.
ဖဲလါမးၡး ၂၀၂၀ဒိးန့ၢ်ဘၣ်တၢ်ဆိၣ်ဂ့ၤလၢထီၣ်ဘၣ်ကၠိဝံၤဝဲဒၣ်ဂ့ၤဂ့ၤသနာ်က့ခီဖျိလၢတၢ်ဆူးတၢ်ဆါ Covid 19 အဃိဖျိကၠိတၢ်စံၣ်တဲၤတဲလီၤတၢ်ဘါဒီးတၢ်ဟ့ၣ်လီၤလံာ်အုၣ်သးအတၢ်ရဲၣ်တၢ်ကျဲၤတဖၣ်မၤအီၤတသ့လၢၤဘၣ်. ဘၣ်ဆၣ်ဒီးခီဖျိခ့ခါတၢ်ကူၣ်သ့လၢအမ့ၢ် Zoom အဃိဒိးန့ၢ်ဘၣ်တၢ်ခွဲးတၢ်ယာ်လၢကမၤဘၣ်ဝဲဖျိကၠိတၢ်စံၣ်တဲၤတဲလီၤတၢ်ဘါလၢလါအီကူး ၆သီ ဒီးတၢ်ဟ့ၣ်လီၤလံာ်အုၣ်သးဖဲလါအီကၢး ၈သီ ၂၀၂၀ နံၣ်န့ၣ်လီၤ.
တနံၣ်ညါအံၤတၢ်မၤလိကစးထီၣ်က့ၤဖဲလါစဲးပထ့ဘၢၣ် ၇သီ- လါအီးကထိဘၢၣ် ၁၃သီ, ၂၀၂၀နံၣ် ခီဖျိ Zoom န့ၣ်လီၤ. လံာ်စီဆှံကၠိတၢ်မၤလိခီဖျိ Zoom အံၤမ့ၢ်တၢ်အခီၣ်ထံးခီၣ်ခါအသီ တခါလၢဘၣ်တၢ်သုးကျဲၤအီၤလၢ ပလံာ်စီဆှံကၠိန့ၣ်လီၤ. အဃိသတးဒီးပလိၣ်ဘၣ်သုတၢ်ထုကဖၣ်ဒီးတၢ်ဆီၣ်ထွဲမၤစၢၤပှၤလၢကျဲအကလုာ်ကလုာ်န့ၣ်လီၤ. တကးဘၣ်ပမုၢ်လၢ်လၢ KBCUSA ဖိလံၤသ့ၣ်တဖၣ်ကဆီၣ်ထွဲမၤစၢၤလၢပကၠိအတၢ်ဒိၣ်ထီၣ်ထီထီၣ် ဆူညါအဂီၢ်န့ၣ်လီၤ.
သးအိၣ်စံးဘျုးဘၣ်ကရၢမိၢ်ပှၢ်ခိၣ်နၢ်ကမံးတံာ်ပှၤမၤသကိးတၢ်တဖၣ်, ဝဲၤကျိၤခိၣ်နၢ်တဖၣ်, ကဝီၤခိၣ်နၢ်ဒီးတၢ်အိၣ် ဖှိၣ်တဖၣ်လၢသုတၢ်သးအိၣ်ဆီၣ်ထွဲမၤစၢၤဘၣ်ကၠိအံၤလၢတၢ်ကိးမံၤဒဲးအဂီၢ်န့ၣ်လီၤ. စံးဘျုးဘၣ် လၢထီဘိမၤစၢၤပှၤ လၢတၢ်လီၢ်တၢ်ကျဲအဂီၢ်ဒီးတၢ်လၢအလိၣ်သ့ၣ်တဖၣ်အဃိန့ၣ်လီၤ. စံးဘျုးဘၣ်သရၣ်သရၣ်မုၣ်ကိးဂၤလၢတၢ်သးအိၣ် ဟ့ၣ်လီၤသးလၢတၢ်ဟဲသိၣ်လိမၤစၢၤဖဲတၢ်ိၣ်ၣ်လိကိးကတီၢ်ဒဲးန့ၣ်လီၤ. သးအိၣ်စံးဘျုးဘၣ်ပှၤကၠိဖိကိးဂၤဒဲးလၢ သုတၢ်သးအိၣ်သးစဲမၤလိနၢ်ပၢၢ်အါထီၣ်ကစၢ်ယွၤအကလုၢ်ကထါအဂီၢ်အဃိန့ၣ်လီၤ.
“မ်ယွၤဆိၣ်ဂ့ၤမၤစၢၤအံးထွဲကွၢ်ထွဲသုထူးထူးတီၤတီၤတက့ၢ်.”
Student's Voice
ကၠိဖိကလုၢ်
ကမှံခုၣ်
CTS ကၠိဖိ
တၢ်နၢ်ဟူကစၢ်ယွၤအတၢ်ကိးလၢတၢ်လဲၤခီဖျိကီခဲအပူၤ
ယမံၤမ့ၢ်ကမှံခုၣ်ဒီးယသဝီဖိဘၣ်တၢ်ကိးအီၤလၢ ခီၤမုၢ်ပျီ သဝီၤ အိၣ်သူၣ်လီၤသးလၢသုးက့ (၅) အပူၤန့ၣ်လီၤ. စးထီၣ်လၢယနီၢ်ဆံးတုၤလီၤလၢ ခဲအံၤယမၤလိတၢ် ဖျိဒၣ်ထဲ လွံၢ်တီၤဧိၤလီၤ. လၢကညီကျိာ်တခီယကွဲးသ့ဖးသ့လီၤ. မ့မ့ၢ်ကျိာ်လၢအဂၤတခီခီဖျိနီၢ်ကစၢ်တၢ်သး စဲအဃိ ယနၢ်ပၢၢ်, ပယီၤ, ကိၤလၤ, လၢနီၢ်ကစၢ်အတၢ်လဲၤခီဖျိ သ့န့ၣ်လီၤ. ခဲအံၤယအိၣ်ဒီးဟံၣ်ဖိဃီဖိတဖၣ်, ယဖိခွါဖိခဲလၢာ် သၢဂၤ, ဖံးလိမၤလိတၢ်အဆၢကတီၢ်န့ၣ်လီၤ. လၢအပူၤကွံာ်ယတဆိကမိၣ်ဒီး မံမီၢ်နီတဘျီလၢယကမၤကစၢ်ယွၤ အတၢ်မၤဘၣ်. ဘၣ်ဆၣ်ခီဖျိ ဟံၣ်ဖိဃီဖိတၢ်ကီတၢ်ခဲ တၢ်တဘၣ်လီၢ်ဘၣ်စး, တၢ်သဘံၣ်သဘုၣ်, တၢ်ကွၢ်ဆၢၣ်မဲာ် အါတလၢၤအဃိ မၤယဲတၢ်တသ့ နီတမံဘၣ်. လီၤဂာ်လၢယတူၢ်တန့ၢ်ဘၣ်ဒီး ယဘၣ်တူၢ်န့ၢ်ဆူၣ်, ဒီးယဆိမိၣ် ဟီၣ်ခိၣ်တဘ့ၣ်အံၤအချၢအိၣ်ဒၣ်ထဲလၢ တၢ်ဒ်အံၤလီၤဧါ, ဘၣ်ဆၣ်ယသ့ၣ်နီၣ်ထီၣ်, အိ… ယမ့ၢ်ပှၤခရံာ်ဖိတဂၤ, တၢ်လၢအိၣ်ဒီးယၤခဲအံၤ မ့ၢ်ဒၣ်လံာ်စီဆှံဖိတ ဘ့ၣ်, ဒီးဖဲန့ၣ် ယဟံးထီၣ်ဒီး ယဖးဘၣ်ဆၣ်, လၢယတၢ်ဆိကမိၣ်အပူၤ ထံၣ်မှံဒၣ်ထဲဟံၣ်ဖိဃီဖိအတၢ်လဲၤခီဖျိ စးထီၣ်လၢ (က) တုၤလၢ (ဧ) ဘၣ်ဆၣ် ဖဲန့ၣ် ယဖးလံာ်စီဆှံတကးဘၣ်, ယဃ့ဘါထုကဖၣ်, ဘၣ်ဆၣ်တၢ်တမၤအသး နီတမံၤဘၣ်လီၤ. ဒီးတုၤမ့ၢ်စှၤလါအတီၢ်ပူၤ ယပာ်စီဆှံထီၣ်ယသး, ဖးလံာ်စီဆှံ ဃ့ဘါထုကဖၣ် လၢတၢ်မဲာ်ထံမဲာ်နိအ ပူၤ ဒီးယသ့ၣ်ညါလၢတၢ်သူၣ်ဖှံသးညီၤ ဝးတရံးယၤဖဲ ကြၢးဘၣ်ဆၣ် ယတတ့ၢ်စၢ်လီၤ ယဂံၢ်ယဘါ ခီဖျိတၢ်ရ့လိာ် သးဒီး ယွၤဘၣ်. တုၤမ့ၢ်ယံာ်ထီၣ်ယံာ်ထီၣ် ယတဲကစၢ်ယွၤ လၢယတၢ်ထုကဖၣ်အပူၤ တၢ်ခဲလၢာ်လၢယဘၣ်ကွၢ်ဆၢၣ် မဲာ်အံၤ မ့ၢ်လီၤမၢ်, ယကမၤနတၢ်, စးထီၣ်ဖဲန့ၣ်ယအၢၣ်လီၤတၢ်ဒီး ကစၢ်ယွၤဒီး ကစၢ်ယွၤဒုးထံၣ်ယၤ ကယဲၢ်မ့ၢ်တၢ်လၢ ယလဲၤခီဖျိ လၢလံာ်စီဆှံပူၤ, ဖဲန့ၢ်ယသးအိၣ်ဖး လံာ်စီဆှံ အါန့ၢ်အလီၢ်, ယထံၣ်စီၤယိၤဘး အတၢ်ကီတၢ်ခဲ, ယထံၣ် နီၢ်နၤဧမံ အတၢ်တူၢ်ဘၣ်, ခီဖျိတၢ်ကီတၢ်ခဲတၢ်လီၤမၢ်, အိ… ယဖးဘၣ်ယထံၣ်သမှံက့ၤယဟံၣ်ဖိဃီဖိ မ့ၢ်ဘၣ်ကွၢ် ဆၢၣ်မဲာ်ဒီးမ့ၢ်အိၣ်ဒီး တၢ်ကအုကစွါဘၣ်ဆၣ်သနာ်က့, သးသမူလုၢ်ဒိၣ်ပှ့ၤဒိၣ်တဖၣ် တလီၤမၢ်န့ၢ်ယၤဘၣ်. ဖဲန့ၢ်ယဃ့ ဘါထုကဖၣ်ဒီး ယစံးတၢ်ဘျုးလီၤ. ကစၢ်ဧၢယသ့ၣ်ညါလံ, ဖဲန့ၢ်ယပလၢၢ်ဘၣ်ယွၤ အတၢ်အဲၣ်အါထီၣ် ဒီးယတူၢ်ဘၣ်စ့ၢ် ကီး လၢတၢ်သးခုအါထီၣ် ယသ့ၣ်နီၣ်ထီၣ်က့ၤဖဲယဖးဘၣ် လံာ်စီဆှံလၢအမ့ၢ် တၢ်နးတၢ်ဖှီၣ်မၤအိၣ်ထီၣ်တၢ်ဝံသးစူၤ တၢ်မၤကွၢ် အတၢ်အုၣ်သး ဒီးဒုးအိၣ်ထီၣ် တၢ်မုၢ်လၢ်, တၢ်မုၢ်လၢ်တမၤမဲာ်ဆှးတၢ်ဘၣ်. တကးဘၣ် သးစီဆှံဂၢ်လီၤ, ဟ့ၣ် လီၤပှၤလၢ ယွၤအတၢ်အဲၣ်တၢ်ကွံန့ၣ်လီၤ. တုၤမ့ၢ်ယထံၣ်လၢတၢ်ကီတၢ်ခဲ ဒုးအိၣ်ထီၣ်တၢ်သးခုထဲအံၤညါ ယအၢၣ်လီၤ တၢ်ဒီးကစၢ်ယွၤ ယကဘၣ်မၤလၢပှဲၤလီၤ. ဖဲန့ၢ်ယဃ့ဘါထုကဖၣ်လၢ ယကထီၣ်လံာ်စီဆှံကၠိ ဒီးပမ့ၢ်တဲတၢ်ကတိၤ လၢအဖုၣ်, ကစၢ်ယွၤရဲၣ်ကျဲၤတၢ်တခါတခါဒီး ယတုၤဃီၤလၢတၢ်မုၢ်အပူၤခဲအံၤ, မ့ၢ်တၢ်သးခုဒိၣ်မးလၢ ခါဆူညါယ ကမၤဘၣ် တၢ်သးခုကစီၣ်တၢ်မၤ ဒီးကကဲထီၣ်စ့ၢ်ကီးတၢ်အုၣ်သး လၢပှၤဂၤအဂီၢ်န့ၣ်လီၤ. ယွၤကိးထီၣ်ယၤဖဲယဘၣ် ကွၢ်ဆၢၣ်မဲာ် ဟီၣ်ခိၣ်အတၢ်ဂံၢ်ဆံးဘါစၢ် အပူၤ မ့မ့ၢ်ခဲအံၤ ယထူၣ်ဖျဲးထီၣ်ကွံာ်လၢ ဟီၣ်ခိၣ်, ကစၢ်ယွၤမၤသဘျ့ထီၣ် ယၤဒီး ယကဲထီၣ်ယွၤအကုၢ်အပှၤလၢ ကသၣ်ထီၣ်ဘၣ်ဃး တၢ်စီဆှံလၢကဒိးန့ၢ်ယဲတၢ်မူအထူအယိာ်န့ၣ်လီၤ. ယွၤအ တၢ်အဲၣ်မ့ၢ်တၢ်မူအထူအယိာ်လၢ ယတၢ်လဲၤခီဖျိအပူၤ ခဲအံၤဒီးဆူညါန့ၣ်လီၤ.
ဒီးလၢယဟံၣ်ဖိဃီဖိခဲလၢာ်အကျါ ယမ့ၢ်ယဲတၤသၣ်အဆိကတၢၢ်တဖျၢၣ်လၢယကမၤ ယွၤအတၢ်မၤန့ၣ်လီၤ. ဒီးယကမ့ၢ်စ့ၢ်ကီး တၤသၣ်လၢ အကဲဘျုးလၢပှၤဂၤအဂီၢ် ဃုာ်ဒီး ခရံာ်တၢ်အိၣ်ဖှိၣ်အဂီၢ် ယကဂုာ်ကျဲးစၢးတုၤ တၢ်သံ ကိးက့ၤယၤတစုလီၤ.
ယဂီၢ်ယမူမ့ၢ်ခရံာ် ယသံကမ့ၢ်စ့ၢ်ကီးတၢ်ဘျုးန့ၣ်လီၤ. အဝဲအံၤမ့ၢ်ယွၤ အတၢ်ကိးနီၢ်နီၢ် လၢတၢ်လဲၤခီဖျိအပူၤန့ၣ်လီၤ.
တၢ်ဘျုး
ယတၢ်ဟဲထီၣ်ကၠိယတၢ်လဲၤခီဖျိ ယဒိးန့ၢ်ဘၣ် သရၣ် သရၣ်မုၣ်လၢတၢ်ဟ့ၣ်လီၤသးလၢအဂံၤကတၢၢ် ဒီးတံၤသကိးလၢ အတၢ်ပာ်သူၣ်ပာ်သးလၢအဂ့ၤ ဒီးတၢ်မၤသကိးလၢအဂ့ၤန့ၣ်လီၤ. သ့ၣ်ညါအါထီၣ်ဘၣ်စ့ၢ်ကီး ကၠိဖိသ့ၣ်တဖၣ်တဂၤဒီး တဂၤအတၢ်ပာ်သူၣ်ပာ်သးအိၣ်ဝဲ အါဂၤအါမံအဃိကဲထီၣ်တၢ်မၤလိဒီး တၢ်လဲၤခီဖျိလၢယဂီၢ်န့ၣ်လီၤ.
ယတၢ်ပာ်သူၣ်ပာ်သးလၢကၠိအဖီခိၣ် မ့ၢ်ကၠိတဖျၢၣ်လၢ ဂ့ၤလၢယဂီၢ်ဒီး ကဲထီၣ်စ့ၢ်ကီးတၢ်ဘျုးတၢ်ဖှိၣ် လၢပှၤအါဂၤအ ဂီၢ်ဒီးလၢခရံာ်အဘီအမုၢ် တၢ်သးခုကစီၣ် ကဝးဟီၣ်ခိၣ်ဒီး ကလဲၤထီၣ်လဲၤထီအဂီၢ် ယကဂုာ်ကျဲးစၢးမၤအဂ့ၤကတၢၢ် န့ၣ်လီၤ.
ယတၢ်ဆိကမိၣ်လၢကၠိအဖီခိၣ် ဒ်သိးကၠိကလဲၤထီၣ်လဲၤထီ ဒီးကၠိအဘၣ်ဘျုးဘၣ်ဖှိၣ်ကအိၣ်အဂီၢ် ယတၢ်ဆိကမိၣ် ဒ်မ့ၢ်ဝဲလၢယသနၢၢ် ဒၣ်ဝဲအဂီၢ် န့ၢ် ဖဲတၢ်သ့အိၣ်ဒီးယၤ ယပာ်လီၤယသးလၢ ယကသုအါထီၣ်စ့ၢ်ပာ်ကွီၤန့ၣ်လီၤ.
တၢ်လၢယဒိးန့ၢ်ဘၣ်လၢကၠိမ့ၢ်ဝဲ ယွၤဂ့ၢ်ပီညါတၢ်မၤလိ လၢကဒုးဒိၣ်ထီၣ်နီၢ်သး အတၢ်ကူၣ်ဘၣ်ကူၣ်သ့ သရၣ်သရၣ် မုၣ်သ့ၣ်တဖၣ်အတၢ်ပာ်သူၣ်ပာ်သးလၢ ဂ့ၤလၢပဖီခိၣ်ဒီး ပဝဲပှၤမၤလိတၢ်ဖိအတၢ်ပာ်သူၣ်ပာ်သး ဒီးပတၢ်ရ့လိာ်သး ဒ်ခရံာ်ဖိပှၤမၤသကိး န့ၣ်လီၤ.
အဲၣ်စိ
krychoviak
ခီဖျိလၢယဟဲထီၣ်လံာ်စီဆှံကၠိအံၤယပလၢၢ်ဘၣ်လၢ ခါဆူညါ ဒ်သိးယကသ့ၣ်ညါအါထီၣ်ကစၢ်ယွၤအကလုၢ်ကထါ အါထီၣ်ဒီးကဒိၣ်ထီၣ် ဒီး ပလၢၢ်ဘၣ်စ့ၢ်ကီးခါဆူညါပကမ့ၢ်ပှၤသ့ၣ်တဖၣ်လၢကသ့အုၣ်အသးလၢ ပှၤဂီၢ်မုၢ်သ့ၣ်တဖၣ် အကျါဒီး ကသ့စံၣ်တဲၤတဲလီၤ တၢ်သးခုကစီၣ်သ့ၣ်ဝဖၣ်န့ၣ်လီၤ. ဒီးယစံးဘျုးစ့ၢ်ကီးကစၢ်ယွၤဟ့ၣ်ပှၤ သရၣ်သမါလၢအဂ့ၤသ့ၣ်တဖၣ်န့ၣ်လီၤ.
ယတၢ်ဟဲထီၣ်ကၠိအခါယတၢ်လဲၤခီဖျိန့ၣ် ယတၢ်မၤလိသ့ၣ်တဖၣ်န့ၣ်ဂ့ၤဒိၣ်မးလီၤ. ယမၤလိဘၣ်စ့ၢ်ကီး ခရံာ်ဖိတၢ်ကူၣ် ဘၣ်ကူၣ်သ့ဒီး ဘၣ်ဃးဒီးလံာ်စီဆှံအသီဒီး အလီၢ်လံၤ ဒီးယမၤလိဘၣ်စ့ၢ်ကီး နိး တၢ်သူၣ်ဝံၣ်သးဆၢဒီး တၢ်စံၣ်တဲၤ တဲလီၤ သ့ၣ်တဖၣ်န့ၣ်လီၤ.
ယဟဲထီၣ်လံာ်စီဆှံကၠိအံၤကဲဘျုးလၢယဂီၢ် ဒ်သျးယကမၤလိအါထီၣ်ဘၣ်ကစၢ်ယွၤအကလုၢ်ကထါအတၢ်မ့ၢ်တၢ်တီ ဒီး မ့ၢ်စ့ၢ်ကီး ပကမ့ၢ်ပှၤလၢအသ့အုၣ်အသးလၢ တၢ်မ့ၢ်တၢ်တီအပူၤဒီး ပကသ့ၣ်ညါဘၣ်စ့ၢ်ကီး ကစၢ်ယွၤအတၢ်မၤဂ့ၤ အတၢ်မၤဘျါက့ၤပှၤသ့ၣ်တဖၣ်န့ၣ်လီၤ.
တၢ်လၢအဒုးဒိၣ်ထီၣ်ယၤန့ၣ် မ့ၢ်ကစၢ်ယွၤအကလုၢ်ကထါဒီး ကစၢ်ယွၤန့ၣ်မ့ၢ်ပှၤလၢ အအဲၣ်ယၤနီၢ်နီၢ်တဂၤလီၤ. ဖဲယဘၣ်ကွၢ်ဆၢၣ်မဲာ်ဒီးတၢ်ဆူးတၢ်ဆါ အခါမ့ၢ်ဂ့ၤ, ယဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအကလုာ်ကလုာ်မ့ၢ်ဂ့ၤ, အကလုၢ်တဖျၢၣ်လၢအဟဲထီၣ်လၢယနၢ်ပူၤဒီး စံးဝဲဒၣ်, ဖိမုၣ်ဧၢနတၢ်နာ် မၤဘျါက့ၤနၤလံဒီး တဘျီဃီ ယသ့ၣ်ညါ လၢ အအဲၣ်ယၤလၢ တၢ်မူအထူအယိာ်န့ၣ်လီၤ. လၢအကမၤစှၤလီၤယတၢ်အိၣ်မူဒု တအိၣ်နီတမံၤဘၣ်.
တၢ်လၢယသးအိၣ်တဲဖျါမ့ၢ်ဒ်အံၤလီၤ. မ်သုကသ့ၣ်နီၣ်ဘၣ်ယၤလၢတၢ်ထုကဖၣ် ခီဖျိလၢတၢ်ဆူးတၢ်ဆါဒီး ယထီၣ်ပှၢ် ယံာ်လံ ဘၣ်ဆၣ်ယတဒိးန့ၢ်ဘၣ်ဒံးယချံယသၣ် ဘၣ်ဆၣ်ဒီး ယဟုးဟးဂီၤကွံာ်ဝဲလီၤ. ယလဲၤမၤကွၢ်သးလၢတၢ်ဆါဟံၣ် န့ၣ် ကသံၣ်သရၣ်တဲယၤလၢတဘၣ်တၢ်နီတမံၤဘၣ်. ဘၣ်ဆၣ်ဒီး ပတသ့ၣ်ညါကီးဘၣ်ဒီး ယနာ်လၢခါဆူညါ သုကသ့ၣ်နီၣ်ယၤလၢ တၢ်ထုကဖၣ်ဒ်အံၤလီၤ. မ်ယဒၢသုတဟးဂီၤလၢၤတဂ့ၤ, ဒီးအကကဲထီၣ်ဒၣ်ဝဲလၢ ဖိလၢအဂ့ၤဒီး ကမ့ၢ်ဖိလၢတၢ်န့ၢ်သါဟဲလၢကစၢ်ယွၤန့ၣ်တက့ၢ်. မ်ယွၤကဆိၣ်ဂ့ၤဘၣ်သရၣ် သရၣ်မုၣ်ကိးနီၢ်ဂၤဒဲးတက့ၢ်. ဒီးမ်ယွၤလၢ အမူဝဲတဂၤကဟ့ၣ်လီၤဘၣ်သု တၢ်ဆိၣ်ဂ့ၤအါအါလၢ သုတၢ်အိၣ်မူပူၤတက့ၢ်. တၢ်ဘျုး